احمد خان کھرل — شہادت دیھاڑ — اکٹھ   


کو شائع کی گئی۔ October 1, 2020    ·(TOTAL VIEWS 126)      No Comments


 شیخ گلفام علی قادری اوکاڑہ
رائے احمد خاں کھرل شہید تے 1857 دی جنگ آذادی دے سورمیاں دی یاد تے سٹی پریس کلب اوکاڑا وچ بھرواں اکٹھ ہوئیا … سٹی پریس کلب دی چھتر چھانویں ہوئے ایس اکٹھ وچ دیس پنجاب دی نابر ریت دے عظیم کردار رائے احمد خاں کھرل تے اوہدے سنگیاں نوں بھرپور خراج تحسین پیش کیتا گیا… ایس اکٹھ دے پردھان پنجابی دانشور ادیب فضل احمد خسرو سن اتے اچیچے پروہنے سابق صدر اوکاڑہ بار رائے شفیع کھرل ، جنرل سیکرٹری ریجنل یونین آف جرنلسٹس پاکستان عابد مغل، ڈاکٹر نثار احمد، سینئر صحافی دانشور حشمت لودھی ، علمی ادبی شخصیت پروفیسر امین انجم ، رائے ظفر اقبال، عاصم پڈھیار ، رائے فیصل میاں خاں کھرل،تے صدر ستگھرا پریس کلب رائے امداد حسین کھرل نے رائے احمد خاں کھرل تے 1857 دے سورمیاں تے بھرپور گل بات کیتی؛شاعراںنے سورمیاں نوں خراج تحسین پیش کرن لئ منظوم چڑھاوا چاڑھیا اتے میزبانی احمد نواز الغنی ہوراں کیتی سٹی پریس کلب اوکاڑا ہوئے رائے احمد خاں کھرل شہادت دیہاڑ اکٹھ وچ عاصم پڈھیار ہوراں اک متا وی پیش کیتا جو اکٹھ وچ رلت کرن والیاں بھرپور منیا تے سبھ نے اس تے اپنے اپنے دستخط کرکے ویلے دی حکومت توں منگ کیتی کہ رائے احمد خاں کھرل جیہے سورمے نوں خراج تحسین پیش کرن لئی تے آون والیاں پیڑھیاں توں چانن کراون لئی کسے ادارے، سڑک، چوک یا چوراہے نوں اس دے ناں نال متھیا جاوے تے اس نوں تعلیمی سلیبس دا حصا بنایا جاوے … اکٹھ دے اخیر تے رائے احمد خاں کھرل اتے اس دے سنگیآں لئی فاتحہ پڑھی گئی تے سب رل کے ایہ بول بولیا
” پنجاب دے سورمیا _ _ _ اسیں تینوں بھلے نہیں !!!فضل احمد خسرو ہوراں تواریخی حوالیاں نال 1857 دی جنگ آذادی دے سورمیا بارے گل کیتی تے دسیا انگریز فوجاں نوں ٹھلن لئی پنجابیاں تے پنجاب دے کردار نوں سراہئیا تے آکھیا تواریخ نوں تواریخ ہی سمجھیا جاوے کہانیاں نہ گھڑیاں جاون – رائے فیصل میاں خاں کھرل آکھیا کہ انگریز پورے ہندوستان نوں چیر کے اس تے قبضا کیتا جئے کدھرے مزاحمت تے روکا ٹوکی ہوئی تے او صرفپنجاب وچ ہوئ تے احمد خاں کھرل دی شہادت توں بعد ہی او پورے ہندوستان تے قابض ہوئیا – ڈاکٹر نثار احمد ہوراں اپنے وچار سانجھے کردیاں کہیا کہ افسوس والی گل ایہ ہے کہ احمد خاں کھرل نوں مارن والے اسسٹنٹ کمشنر گوگیرہ دی قبر گوگیرہ وچ تے یادگار ساہیوال چرچ وچ موجود ہے پر ساڈی دھرتی دے مانک سپتر احمد خاں کھرل دی یاد وچ اج کجھ وی نہیں – عابد مغل ہوریں آکھیا کہ 21 ستمبر نوں ہمیشا لئی شہادت دیہاڑ متھیا جاوے تاں جو 1857 دے شہیداں نوں بھرپور خراج عقیدت پیش کیتا جاوے – حشمت لودھی گل بات کردیاں آکھیا کہ راوی دا علاقہ لوک بولیاں نال بھریا ہوئیا ہے رائے احمد خاں کھرل تے جنگ آذادی دے سورمیاں دی یاد تے کارنامیاں بارے لوک بولیاں ایتھوں دی جیوندی جاگدی تواریخ ہے جو اج وی سینہ بہ سینہ سچ بولی جاندی ہے کھوجکاراں تے سرکار نوں ایس تے کم کرکے محفوظ کرنا چاہیدا ہے – احمد نوازالغنی نے کہیا کہ اس نوں مان ہے اپنی دھرتی تے جتھے او جنمیا پر ہرکھ ایس گل دا ہے کہ ہزاراں ورہیاں دا ورثہ، لوک ریت، تواریخ سبھ کجھ ساتھوں کھسدا جارہیا ہے سانوں اپنا آپ سانبھنا ہووے گا اپنی تواریخ ، سبھتا، لوک ریت نال جڑ کے ٹیکنالوجی، صنعت، سیاست، سماج وچ اپنیاں صلاحیتاں دا وکھالا کرناہے -ایس اکٹھ وچ سابق صدر سٹی پریس کلب اوکاڑہ نثارا ٓدم جوئیہ، جوائنٹ سیکرٹری رانا عبداللہ سرور،سابق سیکرٹریز شیخ گلفام علی قادری،ڈاکٹر ندیم اسلم، محمد عاشق مغل، چیئرمین ڈی یو جے میاں مزمل جوئیہ، نائب صدر آر یو جے مدثر اعجاز کلاسن سمیت وکھو وکھ شعبہ زندگی توں تعلق رکھن والی شخصیات نے رلت کیتی تے اخیر تے ١٨٥٧ دی جنگ آزادی دے شہیداں دی بخشش لئی دعا کیتی گئی –

Readers Comments (0)




WordPress Themes

Free WordPress Theme