فیصل آباد،احساس بازار میں مستحق افراد کیلئے گرم ملبوسات کی مفت فراہمی شروع   


کو شائع کی گئی۔ January 15, 2022    ·(TOTAL VIEWS 34)      No Comments

فیصل آباد (یو این پی)وزیر اعظم پاکستان عمران خان کے احساس پروگرام کے تحت ضلعی انتظامیہ کے زیر اہتمام تحصیل سٹی میں بڑا احساس بازارفنکشنل ہوگیا ہے۔آرٹس کونسل کی پارکنگ میں قائم بڑے احساس بازار میں مستحق خواتین،مرد وبچوں کو موسم سرما کی مناسبت سے معیاری گرم ملبوسات،شوز،شالز،لحاف،جرابیں،بچوں کے کپڑے،جیکٹس ودیگر سامان کی مفت فراہمی شروع ہوگئی ہے۔احساس بازار میں ملبوسات ودیگر اشیاءکی فراہمی میں مخیر صنعتکار گروپس کی طرف سے بھرپور معاونت فراہم کی گئی ہے اور خواتین ومرد اور بچوں کو سامان کی فراہمی کے لئے الگ الگ سٹالزقائم کئے گئے ہیں۔احساس بازار میں قائم کاؤنٹرز پر مستحق افرادکو قومی شناختی کارڈ کے اندراج کے بعدموصولہ ٹوکن پرنظم وضبط سے ملبوسات،جوتے ودیگر اشیاءلے کر خارجی راستہ سے واپس بھجوایا جارہا ہے۔ڈپٹی کمشنر علی شہزاد،ارکان اسمبلی شکیل شاہد اور فردوس رائے نے احساس بازار کا افتتاح کرکے موقع پر موجود افرادمیں کپڑے،جوتے، لحاف ودیگر سامان تقسیم کیا۔ایڈیشنل ڈپٹی کمشنر ریونیو فضل ربی چیمہ،اسسٹنٹ کمشنر سٹی صاحبزادہ محمد یوسف،سی ای او ہیلتھ ڈاکٹر بلال احمد،چیف کارپوریشن آفیسر میٹروپولیٹن کارپوریشن زبیرحسین نت،ڈائریکٹر آرٹس کونسل زاہد اقبال،اسسٹنٹ کمشنر انڈر ٹریننگ انعم بابر،انچارج کنٹرول روم محمد صادق ودیگر افسران کے علاوہ رہنما پاکستان تحریک انصاف میاں نبیل ارشد، ڈائریکٹر ایپرل صداقت لمیٹڈ حمزہ مختار،ایم ٹی ایم سے ناصر علی ضیائ، سی ای او دی لیگیسی چوہدری یسین ودیگر صنعتکار بھی موجود تھے۔ڈپٹی کمشنر،ارکان اسمبلی اور صنعتکاروں نے احساس بازار کے مجموعی انتظامات دیکھے اور کپڑوں وجوتوں اور دیگر گرم لباس واشیاءکی کوالٹی پر اطمینان کا اظہار کرتے ہوئے صاف ستھرا ماحول ہمہ وقت برقرار رکھنے کی تاکید کی۔ڈپٹی کمشنر نے مستحقین میں گرم ملبوسات واشیاءکی تقسیم کے طریقہ کار پر بریفنگ لی اور میڈیا نمائندگان سے گفتگو کرتے ہوئے کہا کہ حکومت کے احساس پروگرام کے تحت سرد موسم میں مستحقین کو گرم ملبوسات،جیکٹس،شالز،جرابیں،لحاف ودیگر سامان کی فراہمی کے لئے احساس بازارلگایا گیا ہے جو ایک ہفتہ تک فنکشنل رہے گا۔انہوں نے بتایا کہ بازار میں مفت سامان کی تقسیم کمپیوٹرائزڈ طریقے سے کی جارہی ہے جس سے کسی کی حق تلفی نہیں ہوگی۔ڈپٹی کمشنر نے بتایا کہ احساس بازار میں تمام متعلقہ محکموں کا سٹاف موجود ہے جن کی حاضری کی بھی کڑی مانیٹرنگ ہوگی۔انہوں نے احساس بازار کے قیام میں بھرپور معاونت پر فیصل آباد کے مخیر حضرات کا شکریہ اداکیا اور کہا کہ یہاں کے صنعتکار وتاجر انسانی بھلائی کے کاموں میں ہمیشہ صف اول میں رہے ہیں۔انہوں نے کہا کہ بازار کو مزید باسہولت بھی بنایا جائے گا اور ضرورت مندوں کی ضرورت کا خیال رکھیں گے۔انہوں نے بتایا کہ بازار میں میڈیکل کیمپ بھی لگایا گیا ہے جہاں پر غریب مریضوں کو مفت ادویات کی فراہمی کا سلسلہ بھی جاری ہے۔انہوں نے بتایا کہ ضلع کی تحصیلوں میں بھی کم ازکم ایک احساس بازارلگایا جارہا ہے اور تحصیل سمندری میں پہلے بھی احساس بازار قائم ہے۔ارکان اسمبلی نے احساس بازار کو موجودہ حکومت کا مستحسن اقدام قرار دیا۔صنعتکاروں نے کہا کہ احساس بازار میں معیاری کپڑے ودیگر سامان فراہم کررہے ہیں جس کا سلسلہ بازار کے قیام کے آخری روز تک جاری رکھیں گے۔اس موقع پر موجود افراد نے احساس بازار کے قیام کو حکومت پنجاب کا انقلابی اقدام قرار دیا اور ڈپٹی کمشنر علی شہزاداوران کی ٹیم کی طرف سے منظم انتظامات اور غریبوں کا احساس کرنے پر شکریہ اداکیا۔

Readers Comments (0)




WordPress Themes
Weboy