بابراعظم سڑک پر نوجوان مداحوں سے الجھ پڑے، ویڈیو وائرل

سوشل میڈیا پلیٹ فارم پر کرکٹر کو نامناسب رویے پر شدید تنقید کا سامنا ہے
لاہور(یواین پی)قومی ٹیم کے سابق بابراعظم بنگلادیش کیخلاف سیریز سے باہر ہونے کے بعد سڑک پر نوجوانوں سے لڑ پڑے۔سماجی رابطے کی سائٹ ایکس (ٹوئٹر) پر ایک ویڈیو وائرل ہورہی ہے جس میں دیکھا جاسکتا ہے کہ بابراعظم سڑک کے بیچ میں کچھ مداحوں کے ساتھ الجھ رہے ہیں۔ویڈیو میں بابراعظم کو مداحوں نے گھیرا ہوا ہے اور کرکٹر تلخ لہجے میں انہیں کچھ کہہ رہے ہیں تاہم اسکی آواز واضح نہیں کہ معاملہ کیا ہوا۔بابراعظم نے ایک مداح کو دھکا دیتے ہوئے بھیڑ سے نکلے اور اپنی گاڑی کی طرف جاتے دیکھائی دیے، یہ ویڈیو کلپ سوشل میڈیا پر وائرل ہورہا ہے جس پر انہیں کڑی تنقید کا نشانہ بنایا جارہا ہے۔واضح رہے کہ دورہ نیوزی لینڈ میں بدترین پرفارمنس کے بعد بابراعظم کو ٹی20 اسکواڈ سے ڈراپ کردیا گیا تھا جبکہ بنگلادیش کیخلاف ٹی20 سیریز میں انہیں موقع نہیں دیا گیا۔ادھر سابق کرکٹر کامران اکمل اور بابراعظم کے والد اعظم صدیقی کے درمیان سوشل میڈیا پر تلخیاں بڑھ گئی ہیں، گزشتہ دنوں وکٹ کیپر بیٹر کی جانب سے دیے گئے بیان کے بعد کرکٹر کے والد نے نام لیے بغیر انہیں تنقید کا نشانہ بنایا تھا جس پر کامران اکمل نے انہیں اپنی حدود میں رہنے کا مشورہ دیا ہے۔