صدر آصف زرداری کی متحدہ عرب امارات کے صدر سے ملاقات

ملاقات میں دوطرفہ تعلقات کو مزید مضبوط بنانے پر تبادلۂ خیال
اسلام آباد/ابوظہبی (یو این پی) صدرِ مملکت آصف علی زرداری نے آج متحدہ عرب امارات کے صدر اور ابوظہبی کے حکمران ہیز ہائنس شیخ محمد بن زاید النہیان سے ملاقات کی۔ ملاقات کے دوران صدر آصف زرداری ایک اعلیٰ سطحی وفد کے ہمراہ موجود تھے۔ دونوں رہنماؤں نے پاکستان اور یو اے ای کے تاریخی اور برادرانہ تعلقات کو مزید گہرا کرنے کے طریقوں پر تبادلۂ خیال کیا۔اس موقع پر تجارتی، سرمایہ کاری، توانائی، انفراسٹرکچر، ٹیکنالوجی، اور عوامی رابطوں کے شعبوں میں تعاون کے نئے مواقع بھی زیرِ بحث آئے، جس سے اقتصادی اور اسٹریٹجک شراکت داری کے امکانات اجاگر ہوئے۔ صدر زرداری نے حالیہ دورۂ پاکستان کے دوران شیخ محمد بن زاید النہیان کے تعاون کی اہمیت کو اجاگر کیا اور یو اے ای کے مسلسل تعاون پر اظہارِ تشکر کیا۔دونوں جانب نے علاقائی اور بین الاقوامی حالات پر بھی تبادلۂ خیال کیا اور امن، استحکام، اور پائیدار ترقی کو فروغ دینے کے عزم کو دہرایا۔ ملاقات میں خاتونِ اول بی بی آصفہ بھٹو زرداری، چیئرمین پیپلز پارٹی بلاول بھٹو زرداری، وفاقی وزیر داخلہ و انسدادِ منشیات محسن نقوی، اور پاکستان کے سفیر برائے یو اے ای بھی موجود تھے۔ صدر زرداری کا یہ دورہ پاکستان اور یو اے ای کے درمیان دیرپا دوستی اور اسٹریٹجک شراکت داری کی عکاسی کرتا ہے۔