پاکستان کی ترقی دنوں کی بات ہے:مارگن سٹینلے

کراچی (یو این پی) پاکستان کے دشمن اور حاسد جتنا بھی پراپیگنڈہ کرلیں لیکن معروضی حقائق کچھ اور ہی کہتے ہیں۔ دنیا کے 42 سے زائد ممالک کو مالی اور معاشی مشاورت  فراہم کرنے والی معروف کمپنی مارگن سٹینلے کے چیف انویسٹمنٹ سٹریٹجسٹ ڈیوڈ ایم ڈارسٹ نے پیشن گوئی کردی ہے کہ یہ بات طے ہے کہ پاکستان دنیا پر چھانے والا ہے اور اب یہ صرف وقت کی بات ہے کہ یہ کب ہوتا ہے۔ اپنے ایک تازہ ترین لیکچر میں ان کا کہنا تھا کہ آنے والی دہائیوں میں ملکوں کی ترقی میں ڈیموگرافکس (آبادی کی تعداد معیار وغیرہ) اہم ترین کردار اداکریں گی اور پاکستان ایک ایسا ملک ہے کہ جسکی 10 کروڑ سے زائد آبادی 30 سال سے کم عمر لوگوں کی ہے ۔ان کا کہنا تھا کہ پاکستان دنیا کے ان چند ممالک میں سے ایک ہے جن کی آبادی کی اوسط عمر 32 سال ہے اور یہ ان 9 ممالک میں سے ایک ہے جو ملکر اگلے 35 سال کے دوران ایک اورچین بن چکے ہوں گے۔ انہوں نے پاکستان کی جغرافیائی حیثیت کو بھی نہایت منفرد اور اہم قرار دیا اور پاکستانی معیشت، آبادی اور جغرافیے کی بناءپر تجزیہ دیا کہ آنے والے وقت میں یہ ملک دنیا کے افق پر چمکنے والا ہے۔