ہم حکومت نہیں جہاد کرنے آئے ہیں، قربانیوں کے بغیر تبدیلی نہیں آسکتی،عمران خان

Published on August 8, 2018 by    ·(TOTAL VIEWS 320)      No Comments

پشاور(یواین پی) چیئرمین تحریک انصاف عمران خان نے کہا ہے کہ ماضی میں جو لوگ اقتدار میں آئے انہوں نے اپنی ذات کیلئے بہت کچھ کیا تاہم ہم حکومت میں نہیں جہاد کرنے آئے ہیں،ہم نے پاکستان کو فلاحی ریاست بنانا ہے، اقتدار ذات کیلئے نہیں لوگوں کی خدمت کرنی ہے، 5 سالوں میں اس ملک کو تبدیل کرنا ہے، قربانیوں کے بغیر تبدیلی نہیں آسکتی،کوئی صوابدیدی فنڈ کسی کے پاس نہیں ہوگا، قانون کے ذریعے یہ فنڈ ختم کریں گے۔خیبر پختونخوا کی پارلیمانی پارٹی کے اجلاس سے خطاب کرتے ہوئے چیئرمین تحریک انصاف عمران خان نے کہاکہ پاکستان کو معاشی طور پر بہت مسائل درپیش ہیں لہذ اس ضمن میں بہت کام کرنا ہے، مشکل وقت کا سامنا کرنا پڑے گا، آئی ایم ایف کے ساتھ کیا کرنا ہوگا، اس کے لیے بہت سوچ بچار کرنی ہوگی۔ انہوں نے کہاکہ ماضی میں جو لوگ اقتدار میں آئے انہوں نے اپنی ذات کیلئے بہت کچھ کیا تاہم ہم حکومت میں نہیں جہاد کرنے آئے ہیں، جو حالات اب ہیں وہ پہلے کبھی نہیں تھے جب کہ انسان کوشش کرے تو سب کچھ ہوسکتا ہے، میں اس کی بڑی مثال ہوں۔عمران خان نے کہا کہ خرچے کم کرنے ہوں گے، کمیٹی بنائیں گے تاکہ وزیراعظم، صدر اور وزیروں کے خرچے کم کریں، 50 فیصد پاکستانی 2 وقت کی روٹی نہیں کھا سکتے، ملک میں غربت ہے۔ انہوں نے کہا کہ مدینہ کی ریاست کیسے بنی، صرف 11 سال میں رومی سلطنت کو شکست ہوئی، جنگ یرموک میں 13 سال میں فارس کو شکست دی، 7 سو سال تک مسلمان دنیا کی عظیم قوم رہے۔چیئرمین تحریک انصاف نے کہا کہ ہم نے پاکستان کو فلاحی ریاست بنانا ہے، اقتدار ذات کیلئے نہیں لوگوں کی خدمت کرنی ہے، کے پی میں مزید کام کرنا ہے، بلدیات میں مزید اصلاحات لانی ہیں، پولیس اور تعلیم میں مزید کام کرنا ہے۔ ان کا کہنا تھا کوئی گروپنگ نہیں کرنی، جو وزیر کام نہیں کرے گا اسے تبدیل کریں گے، لیڈر کا کوئی گروپ نہیں ہوتا، لیڈر کا صرف نظریہ ہوتا ہے جبکہ 5 سالوں میں اس ملک کو تبدیل کرنا ہے، قربانیوں کے بغیر تبدیلی نہیں آسکتی۔عمران خان نے کہا کہ کے پی کے پارلیمنٹیرینز کو پورے ملک کیلئے مثال بننا ہے، نیا پاکستان بنانا ہے اور آپ لوگوں نے مجھے مایوس نہیں کرنا، وزیراعلی اور وزیروں کا انتخاب میری ذمہ داری ہے، ہر کام میرٹ پر ہوگا اور سب لوگوں کا احتساب ہوگا، سب وزیروں کو ٹارگٹ دیں گے جب کہ وزیروں کو 9 بجے دفتر پہنچنا ہوگا۔چیئرمین تحریک انصاف نے کہا کہ کوئی صوابدیدی فنڈ کسی کے پاس نہیں ہوگا، قانون کے ذریعے یہ فنڈ ختم کریں گے، پرویز خٹک نے بڑی مشکل سے حکومت چلائی، کبھی کوئی چیز چھپی نہیں رہ سکتی، احتیاط کے ساتھ کام کریں، جہاد کریں اور خوف خدا رکھیں۔

Readers Comments (0)




Premium WordPress Themes

WordPress Blog