کھجور کے باغبانوں کو زر پاشی کے عمل پر خصوصی توجہ مرکوز کرنے کی ہدایت

فیصل آباد (یو این پی)محکمہ زراعت نے کھجور کے باغبانوں کو زر پاشی کے عمل پر خصوصی توجہ مرکوز کرنے کی ہدایت کی ہے اور کہاہے کہ فروری کے اختتامی ایام اور مارچ کے آغاز پر کھجور کے کاشتکار و باغبان زر پاشی کی جانب خصوصی توجہ دیں کیونکہ کھجور کے پودے پر نر پھول پہلے لگتے ہیں اسلئے انہیں چاہیے کہ وہ پودے کے نر پھول اکٹھے کرکے دھوپ میں اچھی طرح خشک کرلیں اور جب نر پھول اچھی طرح خشک ہو جائیں توانہیں شیشے کے جار میں محفوظ کرنے کے بعد کھجور کی زر پاشی کیلئے استعمال کیاجائے۔اسسٹنٹ ڈائریکٹر محکمہ زراعت توسیع فیصل آبادڈاکٹر خالد اقبال نے کہاکہ زرپاشی سے قبل باغبان زردانوں کو بھی اچھی طرح خشک کرلیں کیونکہ اگر انہیں مکمل طور پر خشک نہ کیاجائے تو نمی رہ جانے کے باعث وہ ناقابل استعمال ہو جاتے ہیں۔ انہوں نے کہاکہ نر کھجور سے حاصل شدہ زردانوں میں ایک حصہ نر زردانے اور2حصے آٹاملا لیاجائے تو ایک نر کھجور سے 40سے50 تک مادہ کھجوروں کی زرپاشی کی جا سکتی ہے جس سے کھجور کی شاندار فصل کا حصول بھی یقینی ہو جاتاہے۔ انہوں نے کہاکہ کاشتکار وباغبان اس ضمن میں مزید رہنمائی کیلئے محکمہ زراعت توسیع کے عملہ سے بھی مشاورت کرسکتے ہیں۔