بارہ مولہ میں بھارتی فوجی ہیڈکوارٹر پر حملہ، 19 اہلکار ہلاک

سرینگر(یو این پی) مقبو ضہ کشمیر کے ضلع بارہ مولہ کے قصبے اوڑی میں قائم انڈین فوجی مرکز پر مسلح افراد کے حملے میں 19 بھارتی فوجی ہلاک اور متعدد زخمی ہو گئے۔ انڈین اخبار ہندوستان ٹائمز کی رپورٹ کے مطابق اتوار کو علی الصبح 5 بجکر 30 منٹ پر نامعلوم تعداد میں مسلح افراد انڈین فوج کی 12ویں بریگیڈ ہیڈکوارٹرز میں داخل ہوئے اور فائرنگ شروع کر دی۔ یہ فوجی مرکز لائن آف کنٹرول کے قریب ہے جہاں سرحدی تنازع کی وجہ سے پہلے ہی سیکیورٹی بہت زیادہ سخت ہوتی ہے۔ رپورٹ کے مطابق حملہ آوروں اور ہندوستانی فورسز کے درمیان فوجی مرکز کے اندر فائرنگ کا تبادلہ کئی گھنٹے جاری رہا جبکہ دھماکوں کی بھی آوازیں سنائی دیتی رہیں۔ فوجی ہیڈکواٹرز کے اندر سے دھوئیں کے بادل اٹھتے دیکھے گئے، کئی بارکوں میں بھی آگ لگ گئی، حملے میں متعدد بھارتی فوجی زخمی ہوئے جنہیں ہیلی کاپٹر کے ذریعے ہسپتال منتقل کیا گیا۔ بھارتی حکام کا کہنا ہے کہ حملہ آوروں کی تعداد 4 تھی جن پر قابو پانے کیلئے مزید نفری طلب کی گئی، جوابی کاروائی میں حملہ آور مارے گئے۔ ہیلی کاپٹر کی مدد سے بھی علاقے کی نگرانی کی جا رہی ہے۔ ادھر ہندوستانی وزیر داخلہ راج ناتھ سنگھ نے واقعے کی اطلاع ملتے ہیں اپنا دورہ امریکہ اور روس ملتوی کر دیا جبکہ ہنگامی اجلاس بھی طلب کر لیا۔ جموں و کشمیر کی وزیر اعلیٰ محبوبہ مفتی نے بھی وزیر داخلہ راج ناتھ سنگھ کو تازہ ترین صورتحال سے آگاہ کیا جبکہ جموں و کشمیر پولیس اور بھارتی میڈیا نے حملے میں 19 اہلکاروں کی ہلاکت اور متعدد کے زخمی ہونے کی تصدیق کر دی۔ حملے کے بعد فوج کے خصوصی دستوں کو ہیلی کاپٹر کی مدد سے اوڑی میں اتارا گیا جبکہ اوڑی اور لائن آف کنٹرول کی طرف جانے والی سڑکوں کی سیکیورٹی سخت کر دی گئی ہے۔