امریکی سفارت خانے کی یروشلم منتقلی کا فیصلہ باعث تشویش ہے: ترکی

انقرہ (یواین پی )ترکی نے کہا ہے کہ امریکا کا مئی میں اسرائیل میں اپنا سفارت خانہ یروشلم منتقل کرنے کا فیصلہ اقوام متحدہ اور اسلامی تعاون کی تنظیم او آئی سی کے فیصلوں کو نظر انداز کرنے کے مترداف ہے۔غیرملکی خبررساں ادارے کے مطابق ترک وزارت خارجہ نے کہاکہ ایسا کر کے امریکا امن عمل کو نقصان پہنچا رہا ہے۔ ترک وزارت خارجہ نے جاری کیے اپنے ایک بیان میں کہا کہ امریکی فیصلہ تشویش کا باعث ہے۔ واضح رہے کہ امریکی محکمہ خارجہ نے کہا تھا کہ امریکا اسرائیل میں اپنی ایمبیسی رواں برس مئی میں تل ابیب سے یروشلم منتقل کرنے کا منصوبہ رکھتا ہے۔