کراچی(یواین پی) اپنے مداحوں کیلئے جاری ویڈیو پیغام میں شاہد آفریدی کا کہنا تھا کہ سوشل میڈیا پر میری صحت بارے کچھ چہ مگوئیاں کی جا رہی تھیں، میں الحمدللہ ٹھیک ہوں۔اپنے ویڈیو پیغام میں شاہد آفریدی کا کہنا تھا کہ کورونا وائرس سے متاثر ہونے کے بعد کچھ دن تکلیف میں گزرے تاہم جیسے جیسے وقت گزرتا رہا میری طبعیت میں بہتری آنا شروع ہو گئی۔قومی ہیرو نے عوام سے اپنے تجربات بیان کرتے ہوئے کہا کہ کورونا وائرس کو بہت زیادہ سر پر چڑھانے کی ضرورت نہیں ہے۔ کسی بھی بیماری سے جب تک آپ خود نہیں لڑیں گے، اس کا مقابلہ نہیں کر سکتے۔ان کا کہنا تھا کہ یہ دن میرے لیے بہت مشکل ہیں کیونکہ میں آئسولیٹ ہونے کی وجہ سے اپنے بچوں سے مل نہیں سکا اور انھیں پیار نہیں کر پایا، انھیں اپنے سینے سے نہیں لگا پایا۔