اسلام آباد (یو این پی) ترجمان دفتر خارجہ خلیل اللہ قاضی نے کہاہے کہ پاک بھارت وزیراعظم کے درمیان ملاقات کل اوفا میں ہو گی اور اس ملاقات کی تجویز بھارت کی جانب سے دی گئی تھی۔ ترجمان دفتر خارجہ نے ہفتہ وار میڈیا بریفنگ دیتے ہوئے کہا کہ وزیراعظم دورہ روس کے دوران بھارتی وزیرعظم کے علاوہ نوازشریف کی چینی صدر شی جنگ پنگ اور افغان صدر اشرف غنی سے بھی ملاقات متوقع ہے ۔انہوں نے کہاکہ نوازشریف برکس کے ساتویں اجلاس میں شرکت کریں گے،امید ہے کہ شنگھائی تعاون تنظیم کی رکنیت مل جائے گی۔ خلیل اللہ قاضی نے بریفنگ کے دوران بتایا کہ بی بی سی ڈاکیومنٹری پر برطانوی حکومت کے جواب کا انتظار ہے۔ ترجمان دفتر خارجہ نے کہا پاکستان پراکسی وار کا مخالف ہے ، داعش پاکستان کے لیے خطرہ ہو سکتا ہے اس لیے اس خطرے سے نمٹنے کیلئے اقدامات کر رہے ہیں، طالبان اور افغان حکومت مذاکرات میں اہم پیشرفت ہوئی ہے۔