بنکاک: اسپتال کے سامنے دھماکہ‘ 24 زخمی

بنکاک(یوا ین پی)  تھائی لینڈ کے ایک اسپتال کے باہر ہونے والے دھماکے کے نتیجے میں 24 افراد زخمی ہوگئے ہیں ‘ فوج نے داخلی و خارجی راستوں کو سیل کردیا۔تفصیلات کے مطابق دھماکا فرامونگ کتکلاؤ نامی اسپتال کے مرکزی دروازے کے قریب ہوا، جو فوجیوں اور ان کے اہلخانہ کے علاج و معالجے کے حوالے سے مشہور ہے‘ دھماکے میں تاحال 24 افراد کے زخمی ہونے کی اطلاع ملی ہے۔مقامی پولیس کے مطابق جائے وقوعہ سے ملنے مطابق دھماکہ بارودی تھا اور حادثےمیں زیادہ تر افراد کانچ کے ٹکڑے لگنے کے سبب زخمی ہوئے ہیں۔دھماکے کی ذمہ داری اب تک کسی گروپ نے قبول نہیں کی، تھائی فوجیوں نے اسپتال کے داخلی وخارجی راستوں کو سیل کرکے شواہد کی تلاش شروع کردی ہے۔ تھائی فوجی اسپتال پر یہ حملہ عوامی نمائندوں سے اقتدار چھیننے کی تیسری سالگرہ کے موقع پر پیش آیا ہے۔ ملٹری حکام کا کہنا ہے کہ واقعے میں سیاسی مخالفین کا ہاتھ ہوسکتا ہے جبکہ کچھ عناصر مسلم علیحدگی پسندوں کو بھی حادثے کاذمہ دار قرارد ے رہے ہیں۔یاد رہے کہ تھائی لینڈ کا دارالحکومت بنکاک اگست 2015 میں بھی دہشت گردوں کے حملے کا نشانہ بنا  تھا، ایروان مندر کے قریب زور دار دھماکا ہوا،جس میں متعدد افراد ہلاک اور درجن سے زائد زخمی ہوگئے تھے ۔