پاک فضائیہ نے27 فروری کے حوالے سے نیا نغمہ ”اللہ اکبر“ جاری کر دیا

اسلام آباد (یواین پی) پاک فضائیہ نے27 فروری کے حوالے سے نیا نغمہ “اللہ اکبر” جاری کر دیا ہے۔ 27 فروری کا دن پاکستان کی تاریخ میں ایک درخشاں باب کی مانند ہے جس میں پاک فضائیہ نے دن کی روشنی میں دشمن پر کامیاب حملہ کیا تھا۔ تفصیلات کے مطابق پاکستان فضائیہ نے 27 فروری کی مناسبت سے ایک خون گرما دینے والا شاندار نغمہ ” اللہ اکبر” جاری کر دیا ہے۔ترجمان پاک فضائیہ کے مطابق 27 فروری پاکستان کی تاریخ میں ایک درخشاں باب کی مانند ہے، ان کا کہنا ہے کہ یہ ایک ایسا دن ہے جب پاک فضائیہ نے سورج کی روشنی میں دشمن پر ایک کامیاب جوابی حملہ کیا، اس حملے میں پاک فضائیہ کے شاہینوں نے دشمن فورسز کے دو لڑاکا طیاروں کو بھی تباہ کیا جبکہ ابھی نندن نامی ایک پائلٹ کو گرفتار بھی کیا جسے بعدازاں جذبہ خیر سگالی کے طور پر چھوڑ دیا گیا۔مزید تفصیلات کے مطابق پاک فضائیہ کے شعبہ تعلقات عامہ نے 27 فروری کی مناسبت سے نیا نغمہ جاری کر دیا ہے۔ پاکستان کے مایہ ناز گلوکار شجاع حیدر نے اپنے تخلیق کردہ نغمے ’’اللہ اکبر‘‘ میں اپنی آواز کا جادو بھی جگایا ہے۔ اس نغمے میں پاک فضائیہ کے شیر دل جوانوں کی بے مثال بہادری کو خراجِ عقیدت پیش کیا گیا ہے۔ یہ نغمہ پاکستانی قوم کے عزم و حوصلے کی لازوال داستان ہے جس نے ہر قسم کے مشکل حالات کا جواں مردی سے مقابلہ کیا ہے۔واضح رہے کہ گزشتہ سال 27 فروری کو پاک فضائیہ کے شاہینوں نے ملکی حدود میں گھسنے والے 2 بھارتی طیاروں کو مار گرایا تھا جب کہ ایک بھارتی پائلٹ کو گرفتار بھی کر لیا تھا۔ بھارت کی جانب سے 26 فروری 2019ء کو پاکستانی حدود میں بالا کوٹ کے مقام پر ایک نام نہاد جھوٹا آپریشن کیا گیا جس میں بھارتی حکام کی جانب سے متعدد افراد کے مارے جانے کا دعویٰ کیا جاتا رہا تاہم تحقیقات سے پتا چلا تھا کہ بھارتی خفیہ آپریشن میں درختوں کے علاوہ کوئی بھی چیز نشانہ نہ بنی تھی کیونکہ بھارتی طیارے جنگل میں ہی پے لوڈ پھینک کر فرار ہو گئے تھے۔