وزیراعلیٰ پنجاب سے وزیراعلیٰ شکایات سیل کے چیئرمین زبیر احمد خان کی ملاقات

لاہور(یواین پی)وزیراعلیٰ پنجاب چودھری پرویز الٰہی نے وزیراعلیٰ شکایت سیل میں آنے والی درخواستوں کو جلد نمٹانے کی ہدایت کردی۔وزیراعلیٰ پنجاب چودھری پرویزالٰہی سے وزیراعلیٰ شکایات سیل کے چیئرمین زبیر احمد خان نے ملاقات کی۔اس موقع پر وزیراعلیٰ نے عوامی شکایات کے فی الفور ازالے کی ہدایت کرتے ہوئے کہا کہ درخواستوں کو جلد از جلد نمٹایا جائے۔شکایت کے اندراج سے ازالے تک پورا سسٹم آن لائن ہونے سے درخواست گزار کو بہت ریلیف ملے گا۔شکایات کے ازالے کیلئے ہونے والی پیشرفت کے ہر مرحلے سے درخواست گزار کو اپ ڈیٹ رکھا جانا چاہیے۔چودھری پرویز الٰہی نے ہدایت کی کہ بے بنیاد اور جھوٹی درخواستیں دینے والوں کے خلاف بلاامتیاز قانونی کارروائی کی جائے۔