پی ٹی وی میں کروڑوں کی کرپشن، نیب کی تحقیقات شروع

اسلام آباد (یو این پی)  نیب حکام نے پی ٹی وی میں کروڑوں روپے کی کرپشن کی تحقیقات شروع کر دی ہیں جبکہ ایف آئی اے اسلام آباد کلب کو کی گئی 60 لاکھ روپے کی ادائیگی کا ریکارڈ حاصل کرنے کا فیصلہ کیا ہے۔ پی ٹی وی میں ہر سال کروڑوں روپے کی کرپشن کی نشاندہی آڈٹ رپورٹ میں بھی کی گئی ہے۔ نیب حکام کے مطابق پی ٹی وی میں لاکھوں روپے کی لاگت سے ٹی وی سیٹ خریدے گئے تھے اور اس سکینڈل کا مرکزی ملزم قاضی مصطفیٰ کمال ہیں جنہوں نے مبینہ طور پر اس خریداری میں بھاری کرپشن کی تھی۔ نیب حکام نے اس سکینڈل کی ابتدائی انکوائری شروع کر دی ہے اور پی ٹی وی انتظامیہ نے اس سکینڈل کی اہم دستاویزات بھی نیب کو فراہم کر دی ہیں۔ آن لائن کو ذرائع نے بتایا ہے کہ پی ٹی وی کی طرف سے اسلام آباد کلب کو اپنے چار اہلکاروں کی ممبر شپ کیلئے 60 لاکھ کی ادائیگی کی تحقیقات ایف آئی اے نے شروع کر دی ہیں اور ان تحقیقات میں پی ٹی وی انتظامیہ بھرپور تعاون کر رہی ہے، چار اہلکاروں میں اسداللہ خان، قاضی مصطفیٰ، اسد جسپال اور فخر حمید ہیں جنہوں نے غیر قانونی طریقہ سے قومی دولت سے اسلام آباد کلب کی ممبر شپ حاصل کی تھی۔