خاتون رہنما ارم فاروقی نے تحریک انصاف کیوں چھوڑی نئے انکشافات سامنے آگئے

کراچی (یواین پی) عمران خان کے کزن اور سیاسی تجزیہ نگار حفیظ اللہ نیازی کے نام سے منسوب ٹوئٹر اکاﺅنٹ سے الزام عائد کیا گیا ہے کہ حال ہی میں پی ٹی آئی چھوڑنے والی ارم فاروقی کو بنی گالہ سے گندے ای میلز بھیجے گئے تھے لیکن وہ گالیوں کے خوف سے کچھ بول نہیں رہیں۔ حفیظ اللہ نیازی سے منسوب اس ٹویٹ پر ارم فاروقی نے خود ہی معاملہ کلیئر کردیا اور واضح کیا ہے کہ انہیں کوئی ای میلز نہیں بھیجے گئے۔

ارم فاروقی کے پی ٹی آئی کو خیر باد کہنے کے اعلان کے بعد حفیظ اللہ نیازی سے منسوب ٹوئٹر اکاﺅنٹ سے ٹویٹس کیے گئے جن میں عمران خان پر الزامات لگائے گئے۔ حفیظ اللہ نیازی نے کہا کہ جس دن عائشہ گلالئی نے عمران خان پر الزام لگائے، اس دن ارم فاروقی نے تحریک انصاف جوائن کی پر اب ارم نے تحریک انصاف چھوڑنے کا اعلان کردیا۔ایک کے بعد ایک کرکے خاتون رہنما تحریک انصاف چھوڑ رہی ہیں، عائشہ گلالئی کے بعد سلسلہ تھما نہیں، ارم فاروقی بھی پی ٹی آئی سے چلی گئی۔ارم فاروقی کو بھی ہراساں کیا گیا ہو گا لیکن وہ گالیوں کے ڈر سے بول نہیں رہی کیونکہ اگر وہ بولیں تو پھر عمران کے کارکن عائشہ گلالئی کی طرح ارم کی بھی کردار کشی کریں گے۔