عام انتخابات میں عوام اپنے ووٹ کی طاقت سے قومی خود مختاری کے بیانیے پر اپنی مہر ثبت کریں گے
لاہور (یو این پی)عمران خان کے جلسوں میں عوام کی لاکھوں کی تعداد میں شرکت سے ہواؤں کا رخ واضح ہو گیا ہے۔ان خیالات کا اظہارپاکستان تحریک انصاف کے رہنما،چیئرمین ہلال احمر پاکستان،صغری شفیع میموریل ٹرسٹ کے روح رواں اور لاہور کے علاقے حلقہ این اے 123سے پی ٹی آئی کے نامزد امیدوار ابرار الحق نے اپنے بیان میں کیا۔انہوں نے کہاکہ عمران خان کاقومی خود مختاری کے بیانیے کا جادو سر چڑھ کر بول رہا ہے اور انشاء اللہ عام انتخابات میں عوام اپنے ووٹ کی طاقت سے اس پر اپنی مہر ثبت کریں گے۔انہوں نے کہا کہ چیئرمین پاکستان تحریک انصاف عمران خان کی ساری سیاسی زندگی جدوجہد کرتے ہوئے گزری ہے اور اسی کے نتیجے میں عوام نے پاکستان تحریک انصاف کو مرکز میں حکومت دی۔ عمران خان نے اپنے دور حکومت میں اپنی سیاست کو پس پشت ڈال کرملک وقوم کے بہترین مفادمیں غیر معمولی فیصلے کئے جن کے ثمرات سامنے آناشروع ہو گئے تھے۔