قیدیوں کو معاشرے کا اچھا شہری بنانا ہمارا مشن ہے انسپکٹر جنرل جیل خانہ جات پنجاب ملک مبشر احمد خان

اوکاڑہ(یواین پی /شیخ ندیم شیراز )انسپکٹر جنرل جیل خانہ جات پنجاب ملک مبشر احمد خان نے کہا ہے کہ قیدیوں کی فلاح وبہبود کے لیے تمام تروسائل کا استعمال کیا جارہاہے، قیدیوں کو معاشرے کا اچھا شہری بنانا ہمارا مشن ہے، کھانے کے معیار پر کسی صورت سمجھوتہ نہیں ہوگا۔ ان خیالات کااظہار انہوں نے ڈسٹرکٹ جیل اوکاڑہ کے اچانک دورہ کے موقع پر صحافیوں سے گفتگو کرتے ہوئے کیا۔ اس موقع پر ڈی آئی جی جیل خانہ جات ساہیوال ریجنل ملک شو کت فیروز، سپرنٹنڈنٹ ڈسٹر کٹ جیل اوکاڑہ مرزا ساجد بیگ، ڈپٹی سپر نٹنڈ نٹ رانا ناصر سمیت دیگر افسران موجود تھے۔انسپکٹر جنرل جیل خانہ جات پنجاب ملک مبشر احمد خان نے جیل کے مختلف شعبہ جات کا معائنہ کیا اور جیل کی سیکورٹی، ڈسپلن کو بہتر بنانے اور اسیران کی فلاح و بہبود کے حوالے سے موقع پر احکامات جاری کئے۔ملک مبشر احمد خان نے خواتین اور نو عمر اسیران کو بہتر سہولیات کی فراہمی کے حوالے سے بھی ہدایات جاری کیں۔ سپرنٹنڈنٹ ڈسٹرکٹ جیل اوکاڑہ مرزا ساجد بیگ نے آئی جی جیل خانہ جات ملک مبشر احمد خان کو انتظامات کے حوالے سے بریفنگ دی۔ انسپکٹر جنرل جیل خانہ جات پنجاب ملک مبشر احمد خان نے صحافیوں سے گفتگو کرتے ہوئے مزید کہاکہ حکومت پنجاب کے احکامات کی روشنی میں پنجاب کی تمام جیلوں کا دورہ کررہاہوں تاکہ قیدیوں کے مسائل حل ہو سکیں انہوں نے ڈسٹر کٹ جیل اوکاڑہ کے انتظامات پر اطمینان کا اظہار کیا اور جیل انتظامیہ کو مزید بہتری کے لیے احکامات دئیے۔