وزیراعظم محمد نواز شریف کی نقل مکانی کرنے والے افراد کو ہر ممکنہ سہولیات کی فراہمی کی ہدایت

نقل مکانی کرنے والے افراد کی صورتحال کے بارے اجلاس میں وفاقی وزیر عبدالقادر بلوچ اور ڈی جی ملٹری آپریشنز نے وزیراعظم کو بریفنگ دی
اسلام آباد ۔۔۔ وزیراعظم محمد نواز شریف نے نقل مکانی کرنے والے افراد کو ہر ممکنہ سہولیات کی فراہمی کی ہدایت کرتے ہوئے کہا ہے کہ آئی ڈی پیز کا ہر لحاظ سے خیال رکھا جائے گا۔ انہوں نے یہ بات منگل کو نقل مکانی کرنے والے افراد کی صورتحال کے بارے میں اجلاس کی صدارت کرتے ہوئے کہی۔ وفاقی وزیر اطلاعات و نشریات سینیٹر پرویز رشید، گورنر خیبرپختونخوا سردار متہاب عباسی، ڈی جی ملٹری آپریشنز، ڈائریکٹر جنرل آئی ایس پی آر نے اجلاس میں شرکت کی۔ وفاقی وزیر ریاستیں و سرحدی علاقہ جات لیفٹیننٹ جنرل (ر) عبدالقادر بلوچ اور ڈی جی ملٹری آپریشنز نے وزیراعظم کو بریفنگ دی۔ وزیراعظم نے کہا کہ حکومت اس مشکل گھڑی میں نقل مکانی کرنے والے افراد کے ساتھ ہے اور ان کا ہر لحاظ سے خیال رکھا جائے گا۔