پاکستان کو ون ڈے ورلڈ کپ جیتے ہوئے 23 برس بیت گئے

گرین شرٹس نے عمران خان کی قیادت میں پہلی بار عالمی چیمپئن بن کر دنیائے کرکٹ میں اپنی حکمرانی قائم کی تھی
اسلام آباد (یو این پی) پاکستان کو آئی سی سی ون ڈے ورلڈ کپ جیتے ہوئے 23 برس بیت گئے۔ گرین شرٹس نے 25 مارچ 1992ء کو عمران خان کی قیادت میں پہلی بار عالمی چیمپئن بن کر دنیائے کرکٹ میں اپنی حکمرانی قائم کی تھی۔ گرین شرٹس نے فائنل میں حریف انگلش ٹیم کو شکست فاش سے دو چار کیا تھا۔ قومی ٹیم کے اس تاریخ ساز کارنامے کو انجام دیئے 23 برس گزر گئے لیکن عوام کے ذہنوں میں یہ سنہری دن اب بھی تازہ ہے۔ 25 مارچ کے دن سے عوام نے ٹیم سے نئی امیدیں وابستہ کر لی ہیں اور شائقین کرکٹ کا کہنا ہے کہ پاکستانی شاہین اس بار بنگلہ دیش میں جاری ٹی ٹونٹی ورلڈ کپ ٹائٹل جیت کر اس روایت کو دوبارہ دوہرا کر وطن لوٹیں گے۔ شائقین کا کہنا ہے کہ ٹیم متوازن اور مضبوط ہے اگر کھلاڑی متحد ہو کر کھیلے تو کسی بھی ٹیم کیلئے اسے شکست دینا آسان نہیں۔ پاکستانی شائق وسیم وقار نے کہا کہ 1992ء میں قومی ٹیم نے ورلڈ کپ جیت کر نئی تاریخ رقم کی تھی اور قوم تا حیات اس کارنامے کو یاد رکھے گی۔ جمال ریاض نے کہا کہ وہ اسی سال پیدا ہوئے تھے اور انہوں نے ٹیم کے کارنامے کو صرف سنا ہی ہے لیکن میری خواہش ہے کہ ٹیم دوبارہ ورلڈ کپ جیت کر قوم کو خوشیوں کا تحفہ پیش کرے۔