لاہور (یواین پی )اسلام رحمت اور درگزر کرنے کا دین ہے جو ہمیں صبر کی تلقین کرتا ہے ۔ انہوں نے کہا کہ دین اسلام میں کوئی زبردستی نہیں ، امام کعبہ شیخ خالد الغامدی نے لاہور بحریہ ٹاؤن کی گرینڈ مسجد میں نماز جمعہ پڑھائی جس میں نے ہزاروں افراد شریک ہوئے ۔ نماز کے بعد امام کعبہ شیخ خالد الغامدی نے دعا کرائی ۔ اس سے پہلے نماز جمعہ کے لیے اذان دی گئی ۔ امام کعبہ شیخ خالد الغامدی منبر پر رونق افروز ہوئے اور خطبہ جمعہ دیا ۔ انہوں نے اپنے خطبہ میں کہا اسلام میں مذہبی تعصب اور منافرت کی کوئی گنجائش نہیں ہے ، تشدد اور دہشت گردی کی ممانعت ہے ، بعض لوگ تشدد کے ذریعے اسلام کا تشخص مسخ کر رہے ہیں اور دشمن اسلام کو تشدد اور نفرت کے مذہب کے طور پر پیش کر رہے ہیں ۔ انہوں نے اس بات پر بھی زور دیا کہ دین اسلام میں کسی قسم کی زبردستی نہیں ہے ، اسلام نے اقلتیوں کو بہترین حقوق عطا کیے ہیں ، اسلامی حکومتیں اقلتیوں کے ساتھ حسن سلوک روا رکھیں ۔ اسلامی حکومت میں تمام مذاہب کے لوگ پرامن زندگی گزارتے ہیں ، دین اسلام میں ایک دوسرے سے حسد کی اجازت نہیں ہے ، اسلام رحمت اور درگزر کرنے کا دین ہے ، ہمارا دین نہ صرف صبر کی تلقین کرتا ہے بلکہ بہترین اخلاق اور شفقت کا درس بھی دیتا ہے ، سچا اور رحمدل ہونا مومن کی صفات ہیں ، ہم میں سے ہر مسلمان کو خود اپنی اصلاح کرنی چاہیئے ، امام کعبہ شیخ خالد الغامدی نے اس بات پر زور دیا کہ اللہ کی خاطر ہمیں ایک دوسرے کو معاف کر دینا چاہیئے ، مومن کی نشانی ہے کہ وہ ہنس مکھ اور بااخلاق ہوتا ہے ، دین اسلام ہمیں ایک دوسرے سے محبت کا درس دیتا ہے ، امام کعبہ نے کہا علما اور اولیا نے دین اسلام کو پھیلانے میں اہم کردار ادا کیا ہے ، علمائے کرام انصاف کے نظام کے لیے جہدوجہد کریں ۔ سیاست و معیشت سمیت تمام معاملات زندگی میں قرآن و سنت سے رہنمائی لی جائے ، انہوں نے امت مسلمہ کے ہر فرد سے کہا کہ نبی اکرم ﷺ پر مسلسل درود و سلام بھیجا کریں ۔