اسلام آباد (یو این پی)پاکستان پیپلزپارٹی کے چیئرمین بلاول بھٹو زرداری نے آزاد کشمیر انتخابات سے قبل ترقیاتی اسکیموں کے اعلان کرنا پری پول دھاندلی قرار دیدیا ہے اور کہا ہے کہ لیگی امیدواروں کوترقیاتی فنڈزکی فراہمی قبل ازوقت دھاندلی ہے۔ آزادکشمیر میں انتخابات شفاف نہ ہوئے تو سیاسی عدم استحکام بدقسمتی ہوگی۔اپنے بیان میں بلاول بھٹونے کہاکہ کشمیرکونسل کے فنڈز من پسند لوگوں میں تقسیم کرنا عوام کے مینڈیٹ کی توہین ہے۔ حکومت کی جانب سے آزادکشمیر انتخابات پر اثرانداز ہونے کے لئے ایسے اقدامات حیران کن ہیں۔ انہوں نے کہاکہ انتخابات سے قبل ترقیاتی اسکیموں کا اعلان کرنا ووٹ خریدنے کی کوشش ہے۔ تمام ادارے چوکنا رہیں اور کشمیر انتخابات میں دھاندلی کے لئے دھمکیوں کو قبول نہ کریں انہوں نے کہاکہ مسلم لیگ نون کی قیادت نے اپنی غلطیوں سے سبق نہیں سیکھا۔ پیپلز پارٹی آزادکشمیرکے انتخابات میں دھاندلی کی ہرگز اجازت نہیں دے گی۔