دفاعی بجٹ میں سالانہ اضافہ نہ لینا قوم پر احسان نہیں، آرمی چیف

اسلام آباد(یو این پی)پاک فوج کے شعبہ تعلقات عامہ کے مطابق آرمی چیف قمر جاوید باجوہ نےعید لائن آف کنٹرول پر فرائض سر انجام دینے والے جوانوں کے ساتھ گزاری اور نماز عید بھی ان کے ساتھ ہی ادا کی۔ اس موقع پر امن، قومی سلامتی اور استحکام پاکستان کیلئے خصوصی دعائیں کی گئیں۔آرمی چیف نے اس موقع پر اپنے خطاب میں کہا کہ عید پر فیملی سے دور وطن کا دفاع سپاہی کا فخر ہے، وطن کے محافظوں کی پہلی فیملی قوم پھر گھروں میں موجود اہلخانہ ہیں۔ انھوں نے کہا کہ بجٹ کٹوتی کا فیصلہ قوم پر احسان نہیں، موجودہ حالات کا تقاضا ہے، بجٹ کٹوتی سپاہیوں کے معیار زندگی پر اثر انداز نہیں ہوگی۔ تنخواہ میں اضافہ نہ لینے کا فیصلہ بھی صرف افسران کا ہے، اس فیصلے کا اطلاق جوانوں پر نہیں ہو گا۔