محنت کشو ں کا عالمی دن

یکم مئی عالمی سطح پر مزدروں کے عالمی دن کے نام سے منایا جاتاہے ۔اس دن دنیا بھر میں مزدورں کے حقوق کے لیے ریلیاں، مظاہرے ، سیمیناراو ر حکومتی سطح پر پروگرام مرتب کیے جاتے ہیں۔ مزدور یونین، این جی اوز اور سیاسی و سماجی تنظیمیں بھی اپنا کردار ادا کرنے یا پھر صرف نمبر گیم کرنے کے لیے میدان میں آتی ہیں۔اس دن ہر طرف مزدور کی بات ہورہی ہوتی ہے۔ کوئی کہتا ہے مزدور غربت کی چکی میں پس رہا ہے تو کوئی بولتا ہے کہ مزدور کی زندگی بھی کوئی زندگی ہے؟
پاکستان میں بھی یہ دن بڑے زور و شور سے منایا جاتا ہے۔ پاکستان کے تمام شہروں میں مزدورں کے حقوق کے لیے ریلیاں نکالی جاتی ہیں۔ سیمینار منعقد کیے جاتے ہیں جس میں بڑے بڑے لیڈر تقاریر جھاڑتے ہیں۔ ستم یہ ہے کہ دن مزدوروں کا اور فائدہ امیر اٹھاتے ہیں۔ کبھی کسی این جی او یا سماجی تنظیم نے اس دن کے موقع پر کسی مزدور کو مہمان خصوصی بلایا ہے ؟ دیکھا یہ گیا ہے کہ جب کوئی دن کسی کے نام سے منسوب کیا جاتا ہے تو پھر اس دن اس شخصیت کو ہر جگہ اہمیت حاصل ہوتی ہے ہرکوئی اس کے ناز ونخرے برداشت کرتا ہے اور بلکہ یہاں تک بھی کہہ دیا جاتا ہے کہ ’’ چلو یار آج اس کا دن ہے‘‘ مگر ادھر آوے کا آوابگڑا ہوا ہے ۔ نام مزدوروں کے دن ہوتا ہے اور اہمیت امیروں کو دی جاتی ہے۔ اس دن کسی مزدورکو اس ہال میں داخل بھی نہیں ہونے دیا جاتا جس کے پاس غریبی کاکارڈہوتا ہے۔ ہال میں بھی وہ داخل ہوں گے جن کا سٹینڈرڈ امیروں کے برابر ہوگا۔ اگر سیمناروں میں بیٹھنے والے مزدور ہیں تو پھر وہ کیا ہیں جو ملوں میں کام کررہے ہیں ، راج گیروں کے ساتھ اینٹیں اور گارا اٹھا رہے ہیںیا سڑکوں پر ٹھیلہ لگا کراپنے بچوں کی روزی کما رہے ہیں۔
مزدوروں کے عالمی دن پر پاکستان میں بتائیں کسی امیر کی فیکٹری یاپٹرول پمپ وغیرہ بند کیے گئے ہوںیا کسی نے اپنے گھر کی تعمیر رکوائی ہو کہ چلو آج ان کا دن ہے اور ان کی چھٹی کردیں۔ ہو سکتا ہے کہ یہ امیر لوگ اس دن کی چھٹی کربھی دیں مگر وہ مزدور کیا کرے گا جس کی شام کی روٹی اس دھیاڑی (ڈیلی ویجز)پر منحصر ہے اگر اس نے چھٹی کرلی تو وہ رات کو اپنے بچوں کو کیا کھلا کر سلائے گا؟
یکم مئی کو پاکستان بھر میں مزدور ہر روز کی طرح اپنے کام میں مشغول رہتے ہیں اور اپنے بچوں کا پیٹ پالنے کے لیے محنت کرتے ہیں ان کو اس دن سے کوئی سروکار نہیں، بس اپنے بچوں کے لیے روزی کمانے سے غرض ہے۔ ویسے یکم مئی کو ہر فورم پر مزدورں کی فلاح و بہبودکے لیے بڑی بڑی باتیں کی جاتی ہیں،دعویٰ کیا جاتا ہے مگر ان پر کبھی عمل بھی ہوا ہے؟ ہر گز نہیں کیونکہ وہ باتیں صرف میڈیا کی زینت بننے کے لیے کی جاتی ہیں ۔ تاکہ دنیا دیکھ لے کہ پاکستان مزدوروں کے حقوق کے لیے کتنی تگ ودو کررہا ہے؟
کبھی کسی حکومت نے ایسے اقدام اٹھائے ہیں کہ یکم مئی کے دن ان مزدور وں کو جو روزانہ کی بنیاد پر کام کرتے ہیں(ڈیل ویجز) حکومتی سطح پر کوئی وظیفہ دیکر ان کو چھٹی بھی دی گئی ہوکیونکہ یکم مئی ان کا دن ہے اور وہ اس دن اپنے فیملی کے ساتھ ہنسی خوشی گزار سکیں۔ہمارے حکمرانوں کو یہ سوچ لینا چاہیے کہ پاکستان کی ترقی میں سب سے بڑا کردار ان مزدورکا ہے ۔ مینار پاکستان سے لیکر پارلیمنٹ کی تعمیرتک ان مزدور ں کی محنت کا ثمر ہے ۔ ان کی تعمیر میں ان میں بیٹھنے والوں کاکوئی حصہ نہیں،ایک کاغذ سے لیکر ایٹمی میزائل تک مزدوروں کی وجہ بنتاہے۔
پارلیمینٹ میں بیٹھے ہوئے بتائیں کہ ان کے کیفے ٹیریا میں روٹی ،سالن اور چائے کے ایک کپ کی کیا قیمت ہے ؟ کیا ان کی قیمت ایک مزدور کی روٹی کے برابر ہے ؟ مزدور کی روٹی کی قیمت پانچ روپے اور جبکہ پارلیمینٹ میں بیٹھنے والوں کی روٹی کی کیا قیمت ہے؟ یہ سب کو پتا ہے۔ نعرے ہم مزدوروں کے حقوق کے لگاتے ہیں اور فائدہ امیروں کو پہنچاتے ہیں۔ مزدوروں کے فنڈ کے نام پر کروڑوں روپے لیے جاتے ہیں اور مزدوروں پر اگر خرچ کرنے کی نوبت آجائے تو وہ بڑی مشکل سے ہزاروں میں ہوتی ہے۔
یکم مئی کو عالمی چھٹی ہوتی ہے مگر اس دن تمام لوگ اپنے گھروں میں چین کی نیند سورہے ہوتے ہیںیا چھٹی کافائدہ اٹھا کر گھوم پھر رہے ہوتے ہیں اور مزدور اس دن بھی مزوری کی تلاش میں بھٹک رہا ہوتا ہے۔ اس دن مزدور عام دن کی نسبت زیادہ کام کرتا ہے شاید اس لیے کہ آج اس کاخصوصی دن ہے۔
ابھی حال ہی میں لاہور میں ساؤتھ ایشیا کی لیبر کانفرنس کا انعقاد ہوا جس میں 75غیر ملکی مندوبین نے شرکت کی۔اس کانفرنس میں سارک ممالک کے نمائندوں نے اپنے اپنے ملکوں کے مزدوروں کے رونے روئے اور آخر میں مشترکہ حکمت عملی اختیار کرنے کا اعلان کرکے کانفرنس ختم کردی۔ اس کانفرنس پر اربوں روپے خرچ کیے مگر اس کا نتیجہ کیا نکلا؟ مزدوروں کو اس کا کیا فائدہ ہوا؟ کیا کبھی پاکستان سمیت کسی بھی ملک نے مزدوروں کے عالمی دن پر ان کے لیے کسی پیکج کا اعلان کیا؟ہرگز نہیں پچھلے بجٹ میں حکومت نے مزدورکی تنخواہ نوہزار مقرر کی مگرآج بھی پاکستان میں مزدور کی تنخواہ سات، آٹھ ہزار سے زیادہ نہیں۔مزدور آج بھی مہنگائی کی آگ میں جل رہا ہے اور امیر امیر تر ہوتا جارہا ہے ۔
میں تو اپنے مزدور بھائیوں کے لیے صرف اتنا کہہ سکتا ہوں بقول شاعرمشرق
نہ تو زمیں کے لئے ہے نہ آسماں کے لئے جہاں ہے تیرے لئے تو نہیں جہاں کے لئے