اسلام آباد ۔۔۔ جماعت اسلامی کے امیر سراج الحق کی قیادت میں سیاسی جرگہ نے جمعرات کو قومی اسمبلی میں قائد حزب اختلاف سید خورشید شاہ سے قومی اسمبلی میں ان کی سرکاری رہائشگاہ پر ملاقات کی جس میں ملک کے موجودہ سیاسی صورتحال پر تبادلہ خیال کیا گیا۔ ملاقات کے بعد میڈیا سے بات چیت کرتے ہوئے خورشید شاہ نے اس توقع کا اظہار کیا کہ سیاسی جماعتیں حکومت، تحریک انصاف اور پاکستان عوامی تحریک کے مابین سیاسی تناؤ کے خاتمہ کیلئے اپنے مثبت کردار سے بحران کو جلد حل کرائیں گی۔ سراج الحق نے کہا کہ سیاسی جرگہ مظاہرین کو مذاکرات کی میز پر لانے کیلئے سخت کوششیں کر رہا ہے تاکہ مسائل کو جلد از جلد حل کیا جا سکے۔ انہوں نے کہا کہ اگر دونوں پارٹیاں رضامند ہوئی تو سیاسی جرگہ ضامن بننے کیلئے تیار ہے۔