عبد الستار ایدھی کی وفات نے پوری قوم کو غمزد کردیا؛افتخار ٹھاکر

لاہور( یوا ین پی)سینئر اداکار افتخار ٹھاکر نے عبد الستار ایدھی کے مشن کا علم تھامنے کے اعلان کر دیا ،انسانیت کی خدمت کیلئے عبد الستار ایدھی کے مشن کو آگے بڑھانے کے لئے انکے صاحبزادے فیصل ایدھی سے ملاقات کریں گے ۔ اس حوالے سے میڈیا سے خصوصی گفتگو کرتے ہوئے انہوں نے کہا کہ 14جولائی سے 17جولائی تک کراچی میں عبد الستار ایدھی کے صاحبزادے فیصل ایدھی کیساتھ رہوں گا اور انکے والد عبد الستار ایدھی کے عظیم مشن کی روشنی کو ساتھی اداکاروں اور پورے ملک میں پھیلانے کے لئے ان سے مشاورت کروں گا۔ انہوں نے کہا کہ عبد الستار ایدھی کی وفات نے پوری قوم کو غمزد کردیا ہے ،صرف میں ہی نہیں کوئی بھی شخص اس دکھ کو لفظوں میں بیان نہیں کر سکتا۔ انہوں نے کہاکہ عبد الستار ایدھی فرشتہ صفت انسان تھے ، انہوں نے دکھی اور ضرورت مند انسانیت کی جس طرح سے خدمت کی ہے اس کی دنیا میں مثال نہیں ملتی ۔ افتخار ٹھاکر نے کہا کہ عبد الستار ایدھی کے صاحبزادے فیصل ایدھی کے ساتھ مل کر پورے پاکستان کی گلی گلی میں انکے مشن کو عام کروں گا ۔