سیالکوٹ؛سحری و افطار میں بیشتر علاقوں میں بجلی بند،روزہ دار سخت گرمی میں بغیر بجلی کے روزہ رکھنے پر مجبور

سیالکوٹ(یو این پی )سیالکوٹ میں بجلی کا بحران جاری ، روزہ دار سخت گرمی میں بغیر بجلی کے روزہ رکھنے پر مجبور، سحری و افطار میں بیشتر علاقوں میں بجلی بند ، تفصیلات کے مطابق محکمہ واپڈا کی ناقص پالیسیوں کے باعث سیالکوٹ کے شہری و دیہاتی علاقوں میں بجلی کا بحران جاری ہے ۔ بجلی کی گھنٹوں لوڈ شیڈنگ کے باعث عوام کو شدید مسائل کا سامنا کرنا پڑ رہا ہے ۔ سیالکوٹ کے شہری و دیہی علاقوں میں کئی کئی گھنٹے مسلسل بجلی بند رہتی ہے ۔ شہر اقبال کے بیشتر علاقوں میں گزشتہ روز بھی سحر اور افطار میں بجلی بند رہی ہے ۔ سب ڈویژن گوہد پور ، پاورہاؤس، ڈالوالی ،کمانوالہ ، بھاگووال ، چوبارہ ، پسرور روڈ، سٹی ون اور دیگر علاقوں میں شدید لوڈ شیڈنگ ہو رہی ہے ۔ محکمہ واپڈا شدید لوڈ شیڈنگ پر قابو پانے میں مکمل طور پر ناکام ہو چکی ہے اور حکومت بھی اس سلسلہ میں چشم پوشی کا مظاہرہ کر رہی ہے ۔ شہریوں حلقوں نے حکومتی اعلان کے باوجود لوڈ شیڈنگ کرنے پر تشویش کا اظہار رکرتے ہوئے حکومت سے نوٹس لینے کا مطالبہ کیا ہے ۔