جمہوری دلہے۔۔بھی ووٹ ڈالنے پولنگ اسٹیشنز پہنچ گئے

لاہور/اوکاڑہ( یوا ین پی)لاہور اور اوکاڑہ کے ضمنی انتخابات میں دلہے بھی ووٹ ڈالنے پولنگ اسٹیشنز پہنچ گئے جبکہ مایوں کے جوڑے میں ملبوس دلہن بھی توجہ کا مرکز بن گئی ۔ حلقہ این اے 122کے علاقہ باجا لائن کارہائشی سلمان محمود گزشتہ روز دلہے کے لباس میں باراتیوں کے ہمراہ مسلم لیگ (ن) کو ووٹ ڈالنے کیلئے پہنچ گئے ۔ سلمان محمود نے میڈیا سے گفتگو کرتے ہوئے کہا کہ پیدائشی مسلم لیگی ہوں شادی کی تقریب چھوڑ کر ووٹ ڈالنے کے لئے آیا ہوں۔لاہورمیں این اے 122 کے ضمنی انتخاب میں پی ٹی آئی سے وابستگی رکھنے والا عامر خان بھی پھولوں سے سجی گاڑی پر اہل خانہ کے ہمراہ ووٹ ڈالنے پہنچا اور اپنا ووٹ کاسٹ کیا۔ اس موقع پردلہا کا کہنا تھا کہ انہوں نے پہلے ہی سوچ لیا تھا کہ وہ ووٹ ڈالنے کے بعد ہی بارات لے کر ظفر وال جائیں گے۔ دولہا کا مزید کہنا تھا کہ جس طرح ان کی زندگی میں شادی کے بعد تبدیلی آنے والی ہے بالکل اسی طرح وہ تحریک انصاف کو ووٹ دے کر اپنے حلقے میں بھی تبدیلی کے خواہاں ہیں۔اوکاڑہ میں این اے 144 میں ضمنی انتخاب کیلئے پولنگ کے دوران رخصتی سے قبل مایوں کے کپڑوں میں ملبوث چاندنی نامی دلہن بھی اپنا ووٹ کاسٹ کرنے کے لئے پہنچ گئی اور وہاں موجود عوام کی توجہ کا مرکز بنی رہی ۔دلہن کا کہنا تھا کہ رخصتی تو ہو جائے گی لیکن ووٹ کی اہمیت بہت زیادہ ہے اوریہ پہلے سے ہی ارادہ تھا کہ ووٹ دالنے ضرورجانا ہے۔ دلہن کا کہنا تھا کہ تحریک انصاف کے رہنما اشرف سوہنا نے حلقے میں کسانوں کیلئے بہت اچھے کام کئے اس لئے ہم انہیں ووٹ دینے آئیں۔